RTI Act, 2005 hmanga zawhna Chief Minister’s Office (CMO) in a chhan danin, CMRF a sum lutte hman chhuah dan turah guidelines a awm hran lova, Chief Minister-in ṭul leh mamawh nia a hriat chiante hnenah a pe ṭhin, a ti.

CMRF dawngtu tur ngaihtuahtu committee a hrana siam a ni chunga lova, dilna lutte atangin puih ngai Chief Minister in a tihte hnenah tanpuina pek ṭhin a nih thu tarlan a ni bawk.

Kumin 2024, June ni 20 thlenga sum hmuh Rs. 1,27,91,551 te hi pawl leh mimal 126 te hnenah semdarh a ni. Cheng 1,500 atanga cheng nuai 5 thlenga sem chhuah thin a ni.

CMRF dawng 126 zingah Chief Minister bial, Serchhip assembly constituency aṭangin  dawng an tam ber a, pawl leh mimal 17 te hnenah pek chhuah a ni a, CM chenna leh bial hlui ni bawk, Aizawl West 1 assembly constituency chuan dawt in, pawl leh mimal 12 te hnenah CMRF hi pek an ni bawk. 

CM Relief Fund dawng zingah mimal hming ziah lan si, address hriat loh mi 16 lai an awm bawk. Dawng tam zual zingah- Central YMA disaster response team in cheng nuai 5 dawngin, Serchhip aṭangin mimal pakhat hmingin lung remna tur hmun hnih ah cheng nuai 4 ve ve pek a ni a. Tualpui khua a tuikhur chhe siam nan mi pakhat hnenah cheng nuai 3 pek a nih thu tarlan a ni.

Zoram Today hriat danin, State thenkhat ah chuan CM Relief Fund hman dan tur guidelines an siam thin a, a diltu turin dan an zam hrang hrangte a zawmkim a ngai bawk thin.